2.إزاي تحسب أرقامك صح قبل ما تصرف إعلانات (Free Tools)

ليه لازم تحسب أرقامك قبل ما تفتح الـ Ads Manager؟

في قاعدة مهمة جداً في شغلنا: "لو مش عارف أرقامك ومصاريفك، إنت مش بتدير إعلانات.. إنت بتراهن بفلوسك". المنصات الإعلانية ميعرفوش إنت شاري البضاعة بكام، ولا شركة الشحن بتاخد منك كام، ولا كام أوردر بيرجعلك ومبيستلمش.

عشان كده جهزتلك صفحة تولز مجانية فيها 4 حاسبات سريعة هتسهل عليك الشغل اليومي. تعال نفهم كل واحدة فيهم بتتحسب إزاي وليه بنستخدمها.

1. الـ ROAS ونقطة التعادل (Break-Even ROAS)

الـ ROAS هو الفلوس اللي رجعتلك مقسومة على اللي صرفته في الإعلانات. بس هل لو الـ ROAS بتاعك 3x تبقى كسبان؟ الإجابة: مش شرط خالص!

إيه هي نقطة التعادل (Break-Even)؟

دي النقطة اللي عندها إنت لا كسبان ولا خسران (صافي الربح صفر). لو الـ ROAS بتاعك أعلى منها تبقى كسبان، لو أقل منها تبقى بتخسر من جيبك في كل أوردر.

تأثير الدفع عند الاستلام (COD) والمرتجعات:

في مصر، نسبة الاستلام في المتوسط بتكون بين 70% لـ 80%. يعني من كل 100 أوردر، فيه 20 لـ 30 أوردر بيرجعوا، وبتدفع عليهم شحن رايح وشحن راجع من غير ما تاخد تمن البضاعة. التول دي بتحسبلك نسبة الاستلام والمرتجعات في ثواني.

2. تكلفة الليد والعميل (CPL Tool)

لو شغال ليد جينيريشن (عقارات، كورسات، عيادات، B2B)، إنت مش بتبيع على الويب سايت علطول، إنت بتجمع أرقام ناس مهتمة (Leads). السؤال هنا: أقصى سعر أقدر أدفعه في الـ Ads Manager في الليد الواحد كام؟

خطوات قمع المبيعات (Funnel):

• الليد اللي ملى الفورم: الرقم اللي بيظهرلك في الـ Ads Manager (CPL).
• اللي رد على التليفون ومناسب: نسبة من الناس دي بس هي اللي بترد وتكون جاهزة (Qualified).
• اللي اشترى وقفل الصفقة: العميل النهائي اللي دخل البيزنس فلوس.

الـ Tool دي بتخليك تدخل مكسبك من البيعة ونسبة اللي بيردوا ويشتروا، وتقولك أقصى رقم تدفعه في الليد وماتخسرش، وتقولك كمان تدفع كام عشان تعمل ضعف مكسبك (2x Profit).

3. تسعير المنتجات (Pricing Tool)

في ناس بتسعر بطريقة غريبة: "المنتج واقف عليا بـ 200 جنيه، هبيعه بـ 350 وأبقى كسبت 150 جنيه". بعد ما تصرف إعلانات 100 جنيه لكل أوردر، وتدفع شحن 50 جنيه، ويجيلك مرتجعات.. تلاقي نفسك بتخسر في كل قطعة!

إزاي تسعر منتجك صح؟

سعر البيع لازم يغطي 4 حاجات:

1. تمن البضاعة والتغليف (COGS).
2. تكلفة الإعلان المتوقعة لكل مبيعة (CPA).
3. هامش شحن المرتجعات (عشان متدفعوش من جيبك).
4. صافي الربح اللي إنت عايزه في جيبك.

4. صانع روابط التتبع (UTM Builder)

لو رفعت اللينك في الإعلان علطول من غير UTM، جوجل أناليتكس (GA4) هيسجل الزيارات دي كأنها جاية بالصدفة (Direct)، ومش هتعرف أنهي فيديو أو بوست بالظبط هو اللي عمل المبيعات على الموقع.

الـ 5 حاجات اللي بنحطهم في رابط الـ UTM:

• Source: المنصة (فيسبوك، تيك توك، جوجل).
• Medium: نوع الإعلان (cpc أو story أو reels).
• Campaign: اسم الحملة بتاعتك.
• Content: اسم الفيديو أو الصورة اللي شغال بيها.
• Term: الاستهداف أو اسم الجمهور.

الخلاصة اللي تمشي عليها في كل حملة

1. سعر منتجك صح بالأرقام عشان يستحمل مصاريف الإعلانات والشحن.
2. احسب الـ Break-Even ROAS وحطه قدامك: لو الحملة جابت أقل منه بعد ما صرفت كويس اقفلها وماتترددش.
3. متطلعش إعلان من غير رابط UTM عشان تعرف دايماً الفلوس جاية منين بالظبط.